Batch 2010 twice-to-beat sa SHAABAA Season 29 playoffs
CEBU, Philippines — Ang Hatch IT Solutions Batch 2010 milampaso sa Insular Square Batch 2005, 86-49, human sa eliminasyon sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Si Jasper Diaz mirehistro og impresibong double-double uban ang 31 puntos ug 22 ka rebounds sa dihang ang Batch 2010 misilyo sa No.4 seed sa Division B bitbit ang 3-3 rekord.
Tungod niini, ang Batch 2010 magabaton og twice-to-beat advantage batok sa Batch 2005 sa quarterfinal playoffs nga magsugod karong Domingo, Hunyo 14.
Si Vann Alicias mipupo og 14 puntos, 11 ka rebounds, tulo ka assists ug duha ka steals samtang si Kevin Dinsay mitali sab og 14 puntos uban ang tulo ka rebounds, tulo ka assists ug duha ka steals alang sa Batch 2010, nga mikulata sa Batch 2005 sa nag-unang duha ka kuwarter aron pag-abante og 23 puntos, 39-16, sa halftime.
Dako gihapon og bentaha, 57-28, human sa tulo ka kuwarter, ang Batch 2010 padayong mikastigo sa Batch 2005 aron paburoton ang ilang labaw ngadto sa 40 puntos, 86-46, sa hilimatyong segundos.
Si Antonio Datan maoy nangu sa Batch 2005 bitbit ang 17 puntos, 12 ka rebounds, duha ka assists ug usa ka steal samtang si Deo Araneta mihipos og 10 puntos, usa ka rebound, ug duha ka assists sa pildirong kawsa.
- Latest
