Vietnam tumukod sa Kazakhstan

CANDON CITY, Ilocos Sur - Nagkapit-bisig sa opensa sina Kristina Belova at Zhanna Syroyeshkina para tulungan ang Kazakhstan na pagpagin ang defen­ding champion Vietnam, 18-25, 25-19, 23-25, 25-22, 15-13 sa Asian Volleyball Confederation (AVC) Women’s Cup na nilaro sa Candon City Arena kahapon dito.

Nagkadena sina Belova at Syroyeshkina ng tig-21 points para sa Kazakhstan na nirehistro ang 5-0 karta at hawakan ang top seeding sa Pool A papasok ng semifinals.

“I didn’t do it on my own. We worked together because we want to win this game,” ani Belova. “This game was really important for. We’re just prepared for this game.”

Maliban kina Belova at Syroyeshkina ay mahalaga rin ang iniskor nina Yuliya Fomenko at Tatyana Yatskiv para sa Kazakhstan na dinungisan ang malinis na karta ng Vietnam.

May pinagsamang siyam na puntos ang kinana nina Belova at Fomenko sa fifth set kaya naman nakahabol ang Kazakhstan at nanalo sa event na suportado ng Philippine Sports Commission, FIVB, Volleyball World, AVC, POC at ng City of Candon sa pamumuno ni Mayor Eric D. Singson.

Nakabawi ang Kazakhstan sa Vietnam, natalo sila sa nakaraang taong semifinals at sa 2024 final.

Nagtala si Thuy Tran ng 25 attack points habang nilista nina Thi Bich Thuy Tran at Thi Thuy Dinh ang 17 at 16 points, ayon sa pagkakasunod para sa Vietnam na natuldukan ang 23-game winning streak kasama ang huling tatlong editions.