BOC Cebu chief inireklamo sa Ombudsman

MANILA, Philippines — Inireklamo sa Office of the Ombudsman si Bureau of Customs-Port of Cebu District Collector Alexandra Yap-Lumontad kaugnay ng umano’y iregularidad sa isang pabrika ng sigarilyo sa Mactan Export Processing Zone (MEPZ).

Ang reklamo, na natanggap noong Abril 29, ay tumutukoy sa paggamit ng pekeng official seals at stamps sa clearance documents, gayundin sa falsification ng commercial documents.

Nilabag umano ang ilang probisyon ng Revised Penal Code: Article 161 (forgery of government seal), Article 171 (falsification by a public officer), at Article 172 (falsification by a private individual and use of falsified documents). Maaari rin siyang managot sa Customs Modernization and Tariff Act (RA 10863), partikular sa Section 1401 (unlawful importation or exportation) at Section 1424 (export misdeclaration).

Bukod sa kasong kriminal, nahaharap din si Lumontad sa kasong administratibo dahil umano sa posibleng paglabag sa Anti-Graft and Corrupt Practices Act (RA 3019) at Code of Conduct and Ethical Standards for Public Officials (RA 6713).

Inirekomenda ang pagsasagawa ng preliminary investigation at hiniling ng mga stakeholder mula sa BOC Cebu ang kanyang preventive suspension upang hindi maapektuhan ang imbestigasyon. Nanawagan din sila sa Bureau of Internal Revenue (BIR) na beripikahin ang pagiging tunay ng mga “sin tax” stamps na sangkot sa kaso.

Si Lumontad ay inilipat sa Port of Cebu noong Nobyembre 2025 sa ilalim ng kautusan ni BOC Commissioner Ariel Nepomuceno bilang bahagi ng kampanya laban sa smuggling at korapsyon.