“HOOK UP: The Musical” mobalik sa entablado

CEBU, Philippines — Tungod sa nagbaha nga requests, ipasundayag og balik karong Hunyo 13, 2026 ang orihinal nga Cebuano production nga “HOOK UP: The Musical” sa Sky Hall Seaside Cebu.

Kahinumdoman nga nagmalampuson sa niaging tuig ang maong dula sa entablado kun diin nakadawat kini og mga pagdayeg gumikan sa lig-ong istorya ug production niini.

Ang ilado nga songwriter nga si Jude Gitamondoc maoy direktor sa maong musical play nga nagtuki sa modernong relasyon, identidad, ug sa nagkalainlaing pamaagi sa pagkonektar sa usa’g usa sa digital nga panahon pinaagi sa kombinasyon sa kataw-anan, emosyon, ug kontemporaryong musika.

Ang pagbalik sa maong musikal nahitabo sa panahon nga nagpadayon ang pagsaka sa kaso sa HIV ilabina sa mga kabatan-onan .

Pinaagi sa matinud-anong pagsaysay sa mga istorya ug mga karakter nga duol sa tinuod nga kinabuhi, tumong sa produksyon nga mapalambo ang diskusyon kabahin sa intimacy, kahuyang sa pagbati, sekswal nga kahimsog, stigma, ug tinuod nga koneksyon sa mga tawo. Alang sa mga naghimo niini, ang teatro dili lamang usa ka porma sa kalingawan kondili usa usab ka epektibong paagi sa pag-edukar ug pagpukaw sa kahibalo sa komunidad.

Usa sa mga bida sa maong musikal mao si Shim Dagatan nga modala sa papel ni Tim o mas nailhan nga “TimidTim,” usa ka batan-ong nangita og gugma pinaagi sa usa ka dating app. Sa dagan sa istorya, makaila si Tim og usa ka tawo nga adunay HIV, nga maoy hinungdan sa mas lawom nga pagsabot sa mga hagit, kahadlok, ug kamatuoran nga giatubang sa daghang tawo sa modernong katilingban.

Matud pa ni Shim, ang “HOOK UP: The Musical” dili lamang kutob sa kalingawan apan usa ka makapukaw nga pasumbingay sa kahimtang sa daghang kabatan-onan ug sa LGBTQIA+ community karong panahona. Gipatigbabaw usab sa maong dula ang mga mensahe sa gugma, pagdawat, ug paglaum samtang naghatag og luna alang sa mas bukas ug makahuluganon nga panag-istoryahanay mahitungod sa mga isyu nga kasagarang likayan sa katilingban.

Ang restaging sa musikal pagadumalahan sa Kadasig Entertainment Production ug adunay tulo ka pasundayag sa maong adlaw: alas-1:00 sa hapon alang sa exclusive student matinee, alas-4:30 sa hapon alang sa regular show, ug alas-8:00 sa gabii alang sa gala performance. Suma pa ni Direk Jude , ang pagbalik sa produksyon dili lamang aron mapadako ang pasundayag kondili aron maabot ang mas daghang tumatan-aw nga makabenepisyo sa mensahe ug kahulugan nga gidala sa “HOOK UP: The Musical.”