Ipatigbabaw ang pagka-Pilipino

Gikumpirmar mismo ni Armed Forces of the Philippines chief General Romeo Brawner Jr. ang pagbutang sa China og usa ka "moving structure" sulod sa Bajo de Masinloc o ang mas nailang Scarborough Shoal sa West Philippine Sea.

Segun ni Brawner, ang illegal nga istruktura gibana-banang may gidak-on nga 6 meters by 6 meters ug giingong dunay unom ka mga tawo nga nagbantay niini.

Basi sa hulagway nga kuha sa Philippine Air Force, ang istruktura maklaro nga dunay kahimanan sa kumunikasyon tungod sa mga antenna nga makita niini.

Gibantayan na sa AFP ang maong dapit ug duna na say lakang nga gihimo ang Department of Foreign Affairs pagbadlong sa China.

Ang gihimo sa China sa Bajo de Masinloc usa ka klarong paglapas sa atong utlanan.

Ang pangutana unsaon pagbadlong ang China sa illegal nilang gibuhat ug kun mopatoo ba sab ang maong nasud sa pagbadlong taliwa sa padayon niining papating ug wala pagtahod sa desisyon sa UN arbitral tribunal.

Usa ka butang ang angayang himoon sa atong gobyerno, regardless og maminaw ang China o dili, kinahanglang ipakita sa mga opisyal sa atong nasud ang maisogong lakang ug dili pasagdang mahimong lain nga laing forward operating base sa China ang Bajo de Masinloc.

Kay kun kini mahitabo, mahingpit sa China ang iyang pagkontrolar sa kinatibuk-an sa South China Sea.

Gikinahanglang sa administrasyon ni Presidente Ferdinand Marcos, Jr. ang usa ka holistic approach pag-asdang sa maong problema.

Gikinahanglang ang whole of nation approach. Ang panaghiusa sa tanang opisyal ug sangay sa gobyerno pagbatok sa kaagrisibo sa China pagpangilog sa atong teritoryo.

Kay unsa may kapuslanan sa pagpatigbabaw sa atomg mga opisyal sa ilang mga prinsipyo sa mga butang nga kuno ilang gihimo alang sa kaayohan sa nasud kun sa atong pagmata sa buntag giilog na ang atong nasud sa China?

Seryoso ang hulga sa atong soberenya ug kini atong kapanalipdan kun magkahiusa ang mga pinili sa katawhan.

Hinaot atong isalikway ang mga personal interest ug ipakita nga tinuod ang inyong pagmahal ug paglaban sa nasud ug sa mga Pilipino.

Protihii ang soberenya sa Pilipinas gikan sa mga mananakop ug ipatigbabaw ang tinuod nga pagka-Pilipino.