Labor advisory sa DOLE para sa Independence Day

CEBU, Philippines — Ang Department of Labor and Employment (DOLE) nagpagawas sa Labor Advisory No. 11, Series of 2026, nga naglatid sa mga lagda sa pagbayad sa sweldo sa mga empleyado nga mosulod o dili mosulod sa trabaho atol sa regular holiday sa Hunyo 12, 2026, isip paghinumdom sa Independence Day.

Subay sa Proclamation No. 1006, Series of 2025, gi-klaro sa advisory ang standard nga computation sa holiday pay para sa mga trabahante sa pribadong sektor, depende kung ang empleyado nagtrabaho, wala ni-report, o nagtrabaho lapas sa standard nga walo ka oras.

Para sa mga empleyado nga dili mosulod sa trabaho sa regular holiday, gikinahanglan sa mga employer nga mobayad og 100 porsyento sa inadlaw nga suhulan basta ang empleyado naka-duty o naka-paid leave sa adlaw nga ga-una sa holiday.

Ang parehas nga lagda magamit usab kung ang miaging adlaw usa ka rest day o non-working day, ubos sa mga kondisyon nga gitakda sa existing labor standards.

Para sa trabaho nga gihimo sulod sa regular holiday, ang mga empleyado entitled sa 200 porsyento sa ilang usaka adlaw nga sweldo para sa unang walo ka oras sa trabaho.

Para sa overtime work sa regular holiday, giingon sa advisory nga ang mga empleyado kinahanglan makadawat og dugang 30 porsyento sa ilang hourly rate matag oras nga molapas sa walo ka oras.

Kung ang regular holiday motakdo sa rest day sa empleyado ug siya mosulod sa trabaho, ang bayad kay 200 porsyento sa basic wage para sa unang walo ka oras, dugang pa ang 30 porsyento nga premium, nga nagpasabot og mas taas nga kompensasyon para sa rest day holiday work.

Para sa overtime work sa regular holiday nga dungan sa rest day, ang mga empleyado entitled sa dugang kompensasyon nga gi-compute pinaagi sa sunod-sunod nga 30 porsyento nga pagtaas sa hourly rate.

Ang advisory, nga gipirmahan ni Labor Secretary Francis N. Tolentino niadtong Hunyo 5, 2026, nagsilbing giya alang sa mga employer ug empleyado sa pribadong sektor sa tibuok nasod.

Gidasig sa DOLE ang tanang establisamento nga sundon ang sakto nga computation sa holiday pay subay sa existing labor standards ug masiguro nga ang mga trabahante mahatagan og hustong kompensasyon sa holiday work. (BANAT NEWS)