Natagak sa motorsiklo human nilikay sa checkpoint
CEBU, Philippines — Nasikop ang usa ka 35-anyos nga lalaki nga giingong angkas sa usa ka motorsiklo human kini natagak dihang nisuway og ikyas atol sa gipahigayo’ng checkpoint sa Pari-an Police Station diha sa Barangay Lorega San Miguel, Dakbayan sa Sugbo niadtong Lunes sa gabii.
Giila ang suspetsado nga si Joshua Gonzaga, walay trabaho, residente sa Barangay Duljo Fatima, Dakbayan sa Sugbo.
Base sa taho sa kapolisan nga atol sa ilang gipahigayon nga regular checkpoint sa alas 9:00 sa gabii adunay duha ka lalaki nga sakay og motorsiklo ang nagbiyahe diha sa maong dapit.
Apan dihang nakabantay ang duha sa checkpoint kalit lang nga ni U-turn paingon sa General Echavez St., Barangay San Miguel hinungdan nga natagak ang angkas niini.
Daling nakasibat ang drayber samtang nisuway usab og dagan si Gonzaga apan dali kining nasignit sa mga polis.
Gisuwayan og gukod sa mga polis ang drayber apan wala kini nila naabtan.
Nasakmit sa kapolisan gikan kang Gonzaga ang kalibre.38 nga revolver nga adunay duha ka buhing bala.
Ang suspetsado natingkagagol karon sa detention cell sa Pari-an Police Station samtang padayong gipangita ang kauban niini. — Paul Benedict O. Sariana, Cheny R. Labrador (BANAT NEWS)
- Latest
