Inahan sa kaalautan

Nadakpan ang usa ka 51-anyos nga inahan nga nagdala og illegal nga drugas atol sa iyang pagbisita sa Operation Second Chance sa dakbayan sa Sugbo diin nakakustodiya ang 16-anyos niyang anak kinsa nalambigit usab sa illegal drugs.

Nasakpan sa usa ka house parent ang inahan nga dunay usa ka putos sa shabu nga iyang gisuksok sa iyan bra atol sa pag kapkap sa iyang lawas hinungdan nga gitugyan siya sa kapolisan nga maoy moakikaso sa pagsang-at sa kaso batok sa inahan nga naa karon sa bilanggoan.

Pagkawalay puangod inahana kay inay pagkaon ug ubang panginahanglanon, drugas naman hinuon ang iyang gigasa unta sa iyang anak.

Gipanghimakak niya nga dunay kalabotan ang iyang anak diin pangkunsomo lang matud pa ang nakuhang drugs.

Hunahunaa: ang Operation Second Chance usa ka pasilidad nga gidumala aron hatagan og "bag-ong kahigayonan" ug tul-idong dalan ang mga menor de edad nga nakahimo og sayop sa katilingban.

Ang anak ni Mystica anaa didto tungod gihapon sa gidiling drugas.

Imbis nga ang inahan maoy magdala og paglaom, lamdag, ug maayong ehemplo aron mapadali ang rehabilitasyon sa iyang anak—shabu man hinuon ang iyang dala!

Bisan pa og nangatarungan si Mystica nga "pangkonsumo" lang niya kadto ug wala sugoa sa iyang anak, dili gihapon kini makatunaw sa kamatuoran nga dako kining sagpa sa pamilya ug sa atong katilingban. Ang inahan nga maoy angay’ng moprotekta ug mogiya sa anak gikan sa gahong sa dautang bisyo, mao pa man hinuon ang nagdala sa maong kangitngit ngadto mismo sa pultahan sa rehabilitasyon.

Kaniadto pa man diay napriso na sab kining maong inahan sa samang kaso. Klaro kaayo nga wala pa gyod kini makat-on.

Husto si P/Lt. Col. Franco Rudolf Oriol. Salikwaot kaayo ang maong talan-awon. Kon ang ginikanan mismo mikaon na sa sistema sa ilegal nga drugas, unsa pa man nga ugma ang atong madahom alang sa iyang menor de edad nga anak?

Kinsa pa man ang mosaway sa bata kon ang iyang mismong inahan "unayan" man diay sa bisyo?

Niining bahina, angay natong dayegon ang hugot nga pag-inspeksyon sa mga house parents ug mga guwardiya sa Operation Second Chance. Kon wala pa tungod sa ilang kaigmat, nalinla na usab unta ang balaod.

Apan kini usa usab ka seryosong timaan alang sa Cebu City Police Office: kinahanglan pa nga doblehon ang pagbabantay. Kon ang usa ka inahan makaako sa pagtago og drugas sa iyang sapot aron lang makasulod, unsa pa kaha ang laing mga malinglahong pamaagi sa uban?

Ang kaso ni Mystica dili lang usa ka ordinaryo nga istorya sa pagkapresor. Usa kini ka dakong salamin sa reyalidad—nga usahay, ang labing dako nga kaaway sa kaugmaon sa usa ka kabataan, dili ang impluwensya sa gawas, kondili ang mismong hugaw nga ehemplo sa sulod sa panimalay.

Si Mystica nabilanggko na kaniya tungod sa illegal drugs ug mao usab kini ang nahitabo sa iyang anak kay mao ang giidolo nila ang ilang ginikanan sa kaalautan.