DepEd Lapu-Lapu mipalapad sa urban gardening

CEBU, Philippines — Gipalapad sa Department of Education (DepEd) Lapu-Lapu City Division ug sa Dakbayan sa Lapu-Lapu ang ilang mga programa sa urban gardening ug solid waste management pinaagi sa PROJECT C.R.O.P. (Cleanliness and Recycling for Organic Produce) aron mapalambo ang kahibalo sa mga estudyante bahin sa pag-atiman sa kalikupan.

Ang programa nga gipatuman sa tanang 10 ka distrito sa dakbayan nagtinguha sa paghiusa sa urban agriculture, recycling ug hustong pagdumala sa basura isip kabahin sa adlaw-adlaw nga kalihokan sa mga pampublikong eskwelahan.

Ang PROJECT C.R.O.P. maoy gipalapdan nga bersyon sa Project CINDI (Community-Integrated Nutrition through Diverse Initiative in School Urban Gardening), nga una nga nagtutok lamang sa urban farming. Gidugang sa bag-ong programa ang mas komprehensibong solid waste management component human sa city-wide inventory sa mga pampublikong eskwelahan nga gihimo sa City Environment and Natural Resources Office (CENRO).

Matud ni Mayor Cindi King-Chan, ang inisyatiba gitumong sa pagpalig-on sa responsibilidad sa kabatan-onan sa pagpanalipod sa kalikupan pinaagi sa paghiusa sa agrikultura ug pagdumala sa basura sulod sa mga eskwelahan.

Pormal nga gilusad ang PROJECT C.R.O.P. niadtong Hunyo 5 isip kabahin sa pagsaulog sa World Environment Day pinaagi sa nagkahiusang kalihokan sa tanang distrito sa dakbayan.

Sa Science and Technology Education Centre (STEC) sa District 5, gipangulohan ni Chan ang ceremonial planting sa usa ka vertical garden uban ni Schools Division Superintendent Dr. Marilyn Andales, Assistant Schools Division Superintendent Dr. Ronald Ferrer, Program Focal Person Dr. Lynn Rose Amistad, mga school heads, magtutudlo ug OIC-CENRO Jocelyn Abayan.

Sumala sa mga opisyal, usa sa mga prayoridad sa programa mao ang pagpalambo sa vertical gardening ilabi na sa mga eskwelahang adunay gamay nga luna aron mapahimuslan ang anaa nga espasyo samtang mapadayon ang produksyon sa mga tanom ug mapalambo ang biodiversity.

Aron masuportahan ang implementasyon sa programa, nanghatag usab ang CENRO og mga liso sa nagkalainlaing klase sa utanon ngadto sa mga school heads alang sa ilang Gulayan sa Paaralan projects. Ang ubang mga liso gi-apod apod usab sa ubang distrito pinaagi sa mga personnel sa opisina.

Gilauman sa DepEd ug sa dakbayan nga pinaagi sa PROJECT C.R.O.P., mas molambo ang kahibalo sa mga estudyante sa agrikultura, recycling ug responsableng pagdumala sa basura samtang matabangan ang mga eskwelahan sa paghimo og produktibong tanaman gikan sa wala magamit nga mga luna.  MEL BANAT NEWS