Paligid ng Mendiola, bantay-sarado sa kilos-protesta
Malacañang bibigyan ng proteksyon…
MANILA, Philippines — Ilang araw bago ang pagdiriwang ng Araw ng Kalayaan sa Hunyo 12 ay personal na ininspeksyon ni Manila Police District Director PBGen. Arnold Santiago ang Mendiola.
Ito ay para paghandaan ng MPD ang posibleng pagsasagawa ng kilos protesta sa nasabing lugar at pinatitiyak sa kaniyang mga tauhan na protektahan ang ehekutibo ng pamahalaan, partikular na si Pang. Ferdinand Marcos Jr. para hindi maapektuhan ang kanilang aktibidad.
Kabilang sa kaniyang ininspeksyon ay ang mga pangunahing kalsada papasok at palabas ng Palasyo ng Malacañang.
Siniguro rin ni Santiago na may sapat silang mga tauhan upang magbantay sa Malacañang at panatilihin ang kapayapaan at kaayusan sa lungsod ng Maynila,sa Araw ng Kalayaan.
Una ng lumabas ang ulat na may ilang grupo ang nakatakdang magsagawa ng kilos protesta sa Hunyo 12, subalit wala pang natatanggap ang Philippine National Police na mga banta ng destabilization sa nasabing araw.
- Latest
