Petisyon ni Rodriguez gibasura sa SC
CEBU, Philippines — Gibasura sa Supreme Court en banc ang petisyon ni Cebu City-based shipping operator Paul Rodriguez nga naghangyo og relief human gikansela sa Commission on Elections (Comelec) ang iyang certificate of candidacy (COC) tungod sa sayop nga deklarasyon sa residency.
Sa 10 ka pahina nga resolusyon penetsahan niadtong Pebrero 25, 2026 ug gipagawas lang sa niaging buwan, ang SC nagkanayon nga ang petisyon ni Rodriguez kinahanglan na’ng ibasura tungod kay wala na kini praktikal nga epekto human modaog sa eleksiyon si Camiguin Lone District Representative Jurdin Jesus Romualdo. Ug ang proklamasyon ni Romualdo isip kongresista sa Camiguin maoy hinungdan nga nahimong “moot and academic” ang kaso.
Si Rodriguez niduso sa iyang COC niadtong Oktubre 5, 2024 aron modagan isip representante sa lone district sa Camiguin apan paglabay sa pipila ka semana nihangyo si Romualdo sa Comelec nga kanselahon ang COC ni Rodriguez tungod sa kapakyas sa pagtuman sa residency requirement.
Sa iyang petisyon, si Romualdo nipasangil nga si Rodriguez natawo sa Cebu City ug nagdumala sa shipping firm nga Asian Marine Transport Corp. (AMTC) sa maong siyudad, sayop ang deklarasyon niini nga residente siya sa Camiguin sulod sa 11 ka tuig ug upat ka bulan. Niadtong Marso 19, 2025 gikansela sa Comelec Second Division ang COC ni Rodriguez gumikan sa giingong misrepresentation sa iyang kandidatura.
Gisubay kini sa Comelec en banc pinaagi sa pagpalig-on sa maong desisyon paglabay sa usa ka bulan.
Giklaro usab sa SC nga si Rodriguez nakapasaka lang sa iyang tubag niadtong Pebrero 18, 2025, kapin duha ka bulan human sa gitakdang panahon.
Matud sa hukmanan nga wala kini makakita og legal nga basehan aron irepaso ang kaso.
Samtang, lahi nga kaso ang giatubang ni Rodriguez karong tuiga human ibalik sa Department of Justice (DOJ) niadtong Marso ang kasong perjury batok kaniya.
Sa resolusyon nga gipirmahan ni Justice Secretary Fredderick Vida giingon nga adunay igo nga basehan aron ipadayon ang kaso. Ang perjury charge mahimong mosangpot og silot nga pagkabilanggo ug perpetual disqualification sa paglingkod sa publiko nga katungdanan kong mapamatud-an sa korte nga ang gireklamo nakahimo og kalapasan. — BDB BANAT NEWS
- Latest
