Laing klase sa basher, gituki ni Mika

CEBU, Philippines — Gihisgotan ni Mika Salamanca ang iyang panan-aw mahitungod sa mga basher ug negatibong komento sa social media atol sa iyang pagbisita sa podcast nga “Hot Takes” sa ABS-CBN.

Sa maong programa, gisaysay ni Mika nga dili tanang basher   kay  estranghero, kundili adunay mga higayon nga ang mga tawo nga suod o duol usab sa usa ka personalidad maoy mahimong tinubdan sa mga pag-atake online.

“Naniniwala ako na ang basher hindi lang mga taong hindi mo kilala, minsan mga taong nasa tabi mo gumagawa ng account laban sayo. Hindi mo kailangan hubaran ‘yung sarili mo para makilala ka ng ibang tao,” ni Mika pa .

Ang maong  podcast  kay gidumala nila Gary Ann Lastrilla ug Krish Ramos, diin gihatagan og higayon ang mga artista ug iladong personalidad sa pagpaambit sa ilang prangkahang opinyon sa mga nagkalainlaing hisgotanan.

Makita ang bag-ong mga episode sa “Hot Takes” matag Huwebes alas-9 sa buntag pinaagi sa ABS-CBN Entertainment YouTube channel ug sa ABS-CBN Facebook page.

Golden Cañedo, migradwar sa kursong nursing

Gipaambit sa Cebuana singer nga si Golden Cañedo sa iyang social media post  nga nigradwar na siya sa  kursong Bachelor of Science in Nursing. “Today, I’m proud to share a new milestone—my graduation,” dugang niya, samtang iyang giingon nga dili sayon ang iyang pag-angkon sa diploma.

Miingon si Golden nga ang kinabuhi usahay modala sa laing dalan, ug ang pagtubo nagpasabot sa pagpili og bag-ong  direksyon  gawas sa showbiz aron matuman ang mga damgo ,kini taliwala sa mga nangutana kaniya nganong wala na siya makita sa TV. Si Golden nailhan isip unang kampyon sa talent search nga "The Clash" sa GMA Network niadtong 2018. — Grezy Mie Sibay, CNU-Main Intern

BGYO, mipalanog  sa modernong gugma sa “on demand”

Gisugdan sa P-pop group nga BGYO ang ilang bag-ong hugna  sa musika pinaagi sa pagpagawas sa ilang mini album  nga “On Demand,” nga nagtuki sa kalipay ug kagawasan sa modernong gugma human sa ilang malampusong pasundayag sa D.U.N.K. Music Festival 2026 sa Japan.

“We’ve really found the perfect sound for us, something so undeniably BGYO. The EP is perfect for late-night vibing or early morning feel-good soundtrips,” saysay pa sa  grupo.

Ang mga unod sa maong album kay naglangkob sa  “Fresh,” “Forever Tonight,” “Sinta,” “Mean Girl,” “Life’s Too Short,” “Raindrop,” ug “Trono.”

Madungog kini sa nagkalain-laing  digital streaming platforms .