Gipusil patay, suspek nadakpan
CEBU, Philippines — Patay ang usa ka 20-anyos nga lalaki human gipusil og makadaghang higayon sa duha ka wala ilhing mga tawo sa Sitio Lower Gun Club, Banawa, Barangay Guadalupe, Cebu City niadtong alas 9:20 sa gabii, Miyerkules, Hunyo 3, 2026.
Ang biktima giila nga si Ace Gimeno alyas “Istong,” residente sa Sitio San Roque, Barangay Guadalupe. Sumala sa imbestigasyon sa Guadalupe Police Station ug sa mga saksi sa lugar kalit nga giduol ug gipusil sa duha ka armadong lalaki ang biktima.
Bisan sa grabeng samad sa lawas nabtan pa nga buhi ang biktima sa mga sakop sa Guadalupe Emergency Response Team (GERT) ug gidala sa Cebu City Medical Center apan gideklarar nga patay pag-abot didto.
Nakuha sa crime scene ang walo ka basiyo sa bala ug usa ka bullet slug nga gituohang gikan sa armas nga gigamit sa pagpamusil.
Naghimo og hot pursuit operation ang kapolisan ug pagka-alas 3:30 sa kadlawon, Hunyo 4, 2026, nadakpan ang usa sa mga suspek nga si Pete Hortellano, 29-anyos, residente sa Barangay Guadalupe.
Gipangita pa ang laing suspek nga nailhan na sab sa kapolisan.
Gitan-aw karon sa mga imbestigador ang posible nga kalambigitan sa ilegal nga drugas ang motibo sa maong insidente. (BANAT NEWS)
- Latest
