Bullying gireklamo sa inahang OFW

CEBU, Philippines — Usa ka inahan ang nangayo og tabang ang usa overseas Filipino worker nga inahan para sa iyang anak nga kadete sa usa ka maritime school dinhi sa dakbayan sa Sugbu tungod sa matud pa bullying nga nasinati sa iyang anak.

Ang iyang panawagan pagpangayo og tabang gipaagi niya sa post sa social media human matud pa ang iyahang anak nga kadete gusto nalang maghikog tungod sa pagsige og bully kaniya diha sa maong tunghaan.

Ang maong inahan nga wala nagpaila nagbase sa London nangayo og tabang para sa iyang 19-anyos nga anak nga matud pa niya nagka-emotional breakdown tungod pagsige og bully sa lima ka estudyante sa Marine Engineering (BSMarE).

Giingon niya nga apil sa pagpang bully, gilabay og tumbler ang ulo sa iyang anak atol sa ilang vacant hour.

Matud pa nga tungod niini, nisuway sa pagkutlo sa kinabuhi ang iyang anak maayo nalang nga napugngan kini sa mga kabanay, apan matud niya na-trauma  ang iyang anak.

Hinuon, desidido gihapon ang iyang anak nga mopadayon sa pagtungha.Maong nanawagan ang inahan og dinalian nga aksyon gikan sa maong tunghaan aron masiguro ang kaluwasan sa iyang anak, ug mihangyo nga permanenteng taktakon ang mga sad-an.

Ang maong tunghaan nagpagawas og official statement sa ilang social media page nga nagpahibalo nga gidili ang bullying, diskriminasyon, o bisan unsang klase sa makadaot sa kaayohan sa mga estudyante sa sulod sa ilang tunghaan.

Posibleng masuspenso o ma-expel ang estudyanteng mapamatud-ang nagbuhat niini subay sa mga polisia sa Commission on Higher Education (CHED). — Cheny R. Labrador (BANAT NEWS)