CCHD walay nakitang ebidensiya sa paglabay og ihi

CEBU, Philippines — Walay nakitang ebidensiya ang Cebu City Health Department (CCHD) nga nagpamatuod sa alegasyon nga adunay establisamento diha sa Colon Street o Carbon Market nga naglabay og ihi sa tawo ngadto sa pampublikong drainage system.

Base sa Complaint Investigation Report ug Narrative Report nga gisumite sa CCHD ngadto sa Business Permit and Licensing Office (BPLO) nga sa wala pa ang memorandum nga gipagawas sa Office of the City Administrator niadtong Abril 27, 2026, nakasugod na ang departamento sa pagpahigayon og imbestigasyon sa reklamo nga nikaylap diha sa social media niadtong Abril 25, 2026 kalabot sa usa ka indibidwal nga giingong naglabay og  hugaw nga likido nga gituohang ihi sa tawo ngadto sa drainage system diha sa may dalan Colon duol sa Carbon Market.

Niadtong Abril 27, 2026 gihimo ang unang inspeksiyon diha sa Colon Street diin gisusi ang nagkadaiyang food ug non-food establishments aron matino ang posible nga tinubdan sa giingong paglapas. Naglakip ang operasyon sa ocular inspection ang pagpangutana sa mga tag-iya ug empleyado sa mga establisamento.

Base sa resulta sa inspeksiyon walay nakitang mahinungdanong ebidensiya nga nagdugtong sa bisan unsang establisemento ngadto sa alegasyon.

Nasuta nga kasagaran sa mga pansayan ug drainage system sa mga establisamento anaa sa maayong kondisyon ug naglihok sa hustong paagi, gawas sa problema sa pagbaha panahon sa ting-uwan.  Sa ikaduhang inspeksiyon nga gihimo pagkasunod adlaw natino sa mga imbestigador ang tukmang lugar diin nahitabo ang insidente.

Apan dihang gipakita ang mission order ngadto sa tag-iya sa establisemento namatikdan nga wala kini naglatid sa hustong karsada diin nahitabo ang reklamo ug tungod niini wala gitugotan ang inspection team nga makasulod sa establisamento.

Gibutyag sa representante sa establisemento nga adunay tubig nga gilabay ngadto sa drainage apan giklaro niini nga gikan kini sa nagtulo nga air-conditioning unit ug hugaw nga tubig gikan sa pagpanglimpiyo sa sawog ug dili gikan sa hugaw sa tawo.

Sa ikatulong inspeksyon nga gihimo nakorehian ang mission order diin gitugotan na sa tag-iya ang health inspectors sa pagsusi sa sulod sa establisemento.

Ang ilang assessment nakita nga maayo ug naglihok sa hustong paagi ang drainage ug ang pansayan.

Samtang nagpadayon ang mas lawom nga imbestigasyon sa maong dapit, nakatala ang CCHD sa 66 ka establisemento nga ilang nasusi diha sa Colon area diin adunay 32 ka food establishments ug 42 ka non-food establishments.

Sa maong gidaghanon, 60 ka pansayan ang magamit, lima ang shared comfort rooms, upat ang nakitang barado ug dili maayong kondisyon. (BANAT NEWS)