Victory Liner binuksan Pasay Passenger Lounge

MANILA, Philippines — Opisyal nang binuksan ng Victory Liner ang kanilang bagong Passenger Lounge sa Pasay Terminal, isang makabagong espasyo na nagbibigay-diin sa pangangalaga at matalinong paggamit ng kalikasan upang mapabuti ang karanasan ng bawat manlalakbay.

Dinisenyo upang maghatid ng mas maayos, maginaw, at matiwasay na biyahe, ang lounge ay gumagamit ng mga elementong hango sa kalikasan-mula sa maaliwalas na layout, natural ventilation principles, hanggang sa paggamit ng sustainable materials. Layunin nitong mabawasan ang init at stress na karaniwang nararanasan sa urban transport hubs, habang pinapalakas ang koneksyon ng tao sa kalikasan kahit nasa gitna ng lungsod.

Ang konseptong ito ay pinangunahan ng JP Alipio sa ilalim ng Kalikasan Labs, na naglalayong pagsamahin ang inobasyon at environmental res­ponsibility sa modernong transport infrastructure.

Ayon sa pamunuan ng Victory Liner, ang bagong Passenger Lounge ay hindi lamang dagdag na pasilidad, kundi isang hakbang tungo sa mas sustainable na sistema ng pagbibiyahe.

Sa pagbubukas ng Pasay ­Passenger Lounge, inaanyayahan ang publiko na maranasan ang bagong antas ng travel comfort-kung saan ang bawat biyahe ay may kasamang malasakit sa kalikasan. Para sa karagdagang impormasyon, makipag-ugnayan sa Victory Liner Pasay Terminal.