EDITORYAL — Kurapsyon o personalidad?

Gipasakaan na og kasong graft, plunder ug bribdery sa Office of the Ombudsman ngadto sa Sandiganbayan si Senador Jinggoy Estrada may kalabotan sa anomalya sa flood control projects sa gobiyerno, apil sab ani ang kanhi DPWH Secretary nga si Manuel Bonoan.

Ang kaso basi ni sa resulta sa imbestigasyon nga gihimo sa Department of Justice subay sa mga gipangbutyag ni kanhi DPWH Bulacan Assistant District Engineer Brice Hernandez nga si Estrada nakadawat og kickback nga moabot og P355 milyones gikan sa flood control projects.

Sa nanglabay nga mga adlaw, banha kaayo ang social media bahin anang flood control anomalies, gani gihimo kining sumsuman sa uban sa mga estorya bisan og wala gani sila nakasabot ug nakahibalo kun kinsa gyud ang mga opisyales nga nalambigit.

Pero kaning flood control anomalies, gihimo pang hinagiban sa uban sa ilang politikal nga pagtuo, wala na maghunahuna kun tinuod ba o dili nga ang mga tawong ilang gipasanginlan apil ba gyud sa nangurakot.

Para sa uban, dili pa ni mao ang tanan. Dako ang purohan nga dili pa gyud ni mao, naa pay daghan nga wala palang mautingkay sa mga imbestigador.

Ang kasamtangang administrasyon nagsige og panguykoy sa mga nangaging mga flood control projects sa gobiyerno sulod sa nakalabay nga napulo ka tuig.

Kay sigurado nga daghan pang mga opisyales sa gobiyerno ang nalambigit sa mga anomalya kaniadto sa mga proyektong gigahinan og pundo , apan karon naghilom-hilom lang ug dili gustong matutokan sa imbestigador.

Ang kurapsyon maoy kaaway sa katawhan karon. Dili unta magpili-pili ang mga tawo sa pagkondenar kun kinsa ray ilang ganahan.

Kay kun ang mga Pilipino magpabiling magpahikot sa mga personalidad, paboritong politiko, pagtan-aw sa utang kabubut-on bisan og giilad ra sila, ug kay maoy trending, walay padulngan ang Pilipinas.

Magpabilin kining biktima sa mga kurakot nga mga politikong ilang gibalik-balikan og botar matag modagan sa eleksyon.

Nagkasamot kaut-ot ang mga tawong namotar samtang nagkadato ang mga kurakot ug kawatan sa gobiyerno.