DA: Presyo ng bigas aabot sa P62/kg sa Setyembre

MANILA, Philippines — Posibleng umanong tumaas ang presyo ng bigas pagsapit ng Setyembre, ayon kay Agriculture Secretary Francis Tiu Laurel Jr.

Sa pagpapatuloy ng pagdinig ng Proactive Response and Oversight for Timely and Effective Crisis Strategy (PROTECT) Committee nitong Miyerkules, tinanong ni Sen. Bam Aquino ang DA kung anong produktong agrikultura ang maaaring tumaas ang presyo sa mga susunod na buwan dahil sa epekto ng pagtaas sa produktong petrolyo.

Ayon kay Laurel, posibleng tumaas ang presyo ng bigas sa P60 hanggang P62 kada kilo sa susunod na harvest season sa Setyembre dahil sa pagtaas ng presyo ng fertilizer.

Sinabi ni Laurel na mula sa P1,650 ang fertilizer sa ngayon ay nasa P3,000.

“If we do traditional practices na pareho pa rin na urea gagamitin, hindi tayo gagamit ng alternative, o yung farmers natin will not adopt the alternative fertilizers na sinasuggest ng DA… it can be, the computation as of yesterday is P62 per kilo,” dagdag niya.

Sinabi rin ni Laurel na pinag-aaralan din nila na mapanatili ang mababang presyo ng bigas sa pamamagitan ng “rice blend” at “corn blend”.

Ang rice blend ay paghahalo ng imported na bigas sa local rice o 70-30/60-40 para parehong masuportahan ang lokal na bigas ng mga magsasaka at imported rice habang ang corn blend naman ay 50-50 na white corn at bigas.