Petron, handang ibenta ni Ramon Ang sa gobyerno
MANILA, Philippines — Handa ang business tycoon na si Ramon Ang na ipagbili sa gobyerno ang kanyang kumpanyang Petron Corporation, na itinuturing na pinakamalaking oil refiner at retailer sa bansa, sa gitna ng dinaranas na krisis sa langis.
Ayon kay Ang, makikipagtulungan siya sa pagsusumikap ng pamahalaan na pagaanin ang pasanin ng publiko dahil sa dinaranas na global oil price shock.
Nangako rin si Ang na hindi sila magsasamantala sa kasalukuyang krisis sa langis.
“I promise the public, we will not take advantage of this fuel crisis. ‘Di kami kikita ng mahigit pa sa normal and I’m willing even to lower the income. Balewala ‘yun sakin —‘yung income,” ani Ang, chairman, president at CEO ng Petron, sa sidelines ng pagbubukas ng NAIA Expressway Phase II.
“Sabi ko nga eh, kung gusto ng gobyerno puwedeng ngang bilhin ng gobyerno ang Petron sa ‘kin eh. Kung sa tingin nila mas magaling sila magpatakbo ‘di ba? In short, you have my 100% cooperation na tutulungan ‘yung mga kababayan natin,” aniya pa.
Matatandaang noong 2021 ay una nang inialok ni Ang sa Kongreso na ipagbiling muli sa pamahalaan ang Petron.
Tiniyak naman ni Ang sa isang hiwalay na pahayag, na ang naturang alok ay bukas pa rin hanggang sa ngayon.
- Latest
