Kaso sa Ombudsman harassment, pamumulitika – solon

MANILA, Philippines — Mariing kinondena ni Occidental Mindoro Congressman Leody “Odie” Tarriela bilang harassment at pamumulitika ang isinampang kaso laban sa kaniya sa Ombudsman ng isang Radamalyn Cardoza. Ayon sa mambabatas, harassment at pamumulitika lang umano ito ng kaniyang mga kalaban sa pulitika.

“Ayon sa lumabas na press release, nagsampa sa akin ng kaso si Mr. Cardoza matapos na siya ay gumawa ng “ formal requests [for] copies of public documents from the DPWH-Mindoro District Office”, kaya lang ang kanyang request ay hindi naaksyunan.

Paano naman na naging kasalanan ko na hindi s’ya nabigyan ng kung ano mang hinihingi n’ya sa DPWH? At kung wala nga siyang nakuhang kung anuman, ano ngayon ang basehan ng kanyang kaso?”, pahayag ni Tarriela.

Si Radamalyn Cardoza ay nagpapakilalang isang broadcaster sa Occidental Mindoro, at matagal nang kilala bilang kritiko ng Kongresista. Noong nakaraang 2025 elections, nagsampa rin siya ng disqualification case laban kay Tarriela na ibinasura naman ng COMELEC.

Ayon sa nakasaad sa reklamo ni Cardoza, wala umano siyang masamang hangarin sa pagsasampa ng kaso, hindi niya rin umano intensyon na mang-harass sa pagsasampa niya ng kaso.

Sagot naman ng Kongresista, “ngayon lang ako nakakita ng nagsampa ng kaso na defensive agad na hindi harassment complaint ang kanyang kaso. Kasi malinaw naman na ang kanyang complaint ay harassment lamang at politically motivated. Sa ngayon ay pinaaaral ko na sa aking mga abogado ang kaso na maaring isampa sa taong ito.”