Walang life vests, overloading sinisilip sa lumubog na RoRo

MANILA, Philippines — Walang life vests, overloading sinisilip sa lumubog na RoRo Iimbestigahan ng Mari­time Industry Autho­rity (Marina) ang paha­yag ng ilang survivors na kulang umano ang mga life vests nang lumubog na Roll-on/Roll-off vessel na M/V Trisha Kirsten 3 sa Basilan waters kama­kailan.

Ayon kay Marina spokesperson Dir. Luisito delos Santos, maaaring nagkaroon ng lapses o kakulangan na siya nilang tututukan sa isasagawang imbestigasyon at safety audit sa Aleson Shipping Lines, na siyang may-ari ng lumubog na barko.

“May mga violation na nakikita natin. Una, it appears na ‘yung naka-assign na barko sa mga kababayan natin na luluwas sa araw na ‘yun ay hindi talaga ‘yun ‘yung barko na sasakyan nila... Mukhang pinalitan,” ani delos Santos.

“Kasama rin sa imbestigasyon natin ‘yan (kakulangan ng life vests)... Ang nakakalungkot, ‘yung mga paunang recount ng mga passenger, may mga life vest kaso allegedly, naka-lock ang lagayan ng life vest,” dagdag pa niya.

Paliwanag ni delos Santos, ang life vests ang pangunahing depensa natin lalo na kung nagkakaroon ng mga aberyang ganito.

Ang bilang ng functional life jackets ay dapat na katumbas ng bilang ng authorized passenger capacity ng isang barko.

Samantala, umakyat na sa 39 ang bilang ng mga pasaherong nasawi matapos makarekober ang search teams ng tatlo pang bangkay.