Philippines Embassy: Walang Pinoy sa Indonesia landslide

MANILA, Philippines — Wala pang natatanggap na ulat ang Philippine Embassy sa Indonesia kung may Pinoy na nadamay sa landslide na tumama sa West Java, Indonesia nitong Sabado ng gabi.

“As of this time, no Filipino has been reported to be affected by the incident,” pahayag ng embahada.

Kasabay nito, tiniyak naman ng embahada na masusi silang nakikipag-ugnayan sa Indonesian National Search and Rescue Agency at maging sa Filipino community sa Bandung, West Java hinggil sa landslide, na dulot ng malalakas na pag-ulan sa lugar.

Ayon sa Philippine Embassy, batay sa kanilang natanggap na ulat, walong katao na ang kumpirmadong nasawi sa naturang landslide na nakaapekto sa nasa 113 pamilya.

Mayroon pa umanong kabuuang 82 katao ang patuloy na nawawala habang 23 naman ang iniulat na nasa ligtas nang kalagayan.

“The area has been placed in emergency alert status, with the local government advising residents to be vigilant and evacuate immediately if conditions are deemed unsafe,” anito pa.

Paniniyak pa nito, “The Embassy continues to monitor the situation of Filipinos in the area and hopes that the search and rescue operations of Indonesian authorities will recover more survivors.”

Maaari umanong kumontak sa embassy ang mga Pinoy sa pamamagitan ng kanilang Whatsapp hotline na +62 811 887 344 para sa anumang impormasyon o kinakailangang tulong.