P5.2 bilyon assets na-freeze sa flood control scandal - AMLC

MANILA, Philippines — Umabot na sa P5.2 bilyon ang frozen assets na nauugnay sa mga indibidwal at kumpanyang sinisiyasat kaugnay ng flood control projects corruption scandal, ayon sa Anti-Money Laundering Council (AMLC).

Sinabi ni Executive Director Matthew David sa briefing kasabay ng paglagda ng memorandum of agreement sa pagitan ng AMLC at Department of Public Works and Highways (DPWH) nitong Huwebes, na bukod sa nasabing halaga, inaasahan pa na tataas ang halagang mapi-freeze habang mas maraming bank account at ari-arian ang iniimbestigahan.

Sa buwang ito ay nakakuha na ang AMLC ng 6 na freeze order mula sa Court of Appeals (CA) na sumasaklaw sa mga ari-arian ng mga dating opisyal ng DPWH, mga kontratista at iba pang iniuugnay sa mga kontratista.

Ang kasalukuyang frozen assets ay kinabibilangan ng 1,671 bank account, 58 insurance policy, 163 motor vehicle, 99 real property, at 12 e-wallet account.

Samantala, ang MOA na nilagdaan nina David at Public Works Secretary Vince Dizon ay layunin na gawing ­institutionalize ang information-sharing at pagtutulungan sa pagsisiyasat at pagtugon sa money laundering at mga kaugnay na krimen sa pananalapi.

“To date, I think there are about 2,000 frozen assets since we started with the filing of first with the Ombudsman… More assets are going to get frozen as we file more cases in the next few days with the ICI and the Ombudsman,” ani Dizon.