Autosweep, Easytrip isa na lang — Pangulong Marcos
MANILA, Philippines — Mas magiging madali na ngayon ang pagbiyahe sa mga expressway sa bansa matapos ilunsad ni Pangulong Ferdinand Marcos Jr. ang “One RFID, All Tollways” sa Calamba City, Laguna, kahapon.
Sinabi ng Pangulo na isang radio frequency identification (RFID) sticker na lamang ang kailangan para sa mga toll expressway sa North Luzon Expressway (NLEX), South Luzon Expressway (SLEX), Tarlac-Pangasinan-La Union Expressway (TPLEX) at iba pang expressways sa Luzon.
“Malinaw ang layunin nito, mapabilis ang daloy ng trapiko sa mga toll gate. At malaki ang tulong nito,” anang Pangulo.
Sinaksihan mismo ni Pangulong Marcos ang online registration process sa Toll Collection System Interoperability Project ng RFID service providers na Autosweep at Easytrip.
Sa ilalim ng bagong programa, maaring mamili ang motorista ng autosweep o easytrip para sa gagamiting RFID sa lahat ng tollways.
Maaring magparehistro ang motorista ng kanilang kasalukuyang RFID accounts o kahit sa online.
Umaasa naman si Pangulong Marcos na dahil sa bagong programa, magiging maginhawa, mas mabilis ang biyahe at hindi na malilito ang mga motorista sa paggamit ng RFID.
- Latest
