Nature Reserve na giit ng China, ‘hypocrisy’ – Goitia

MANILA, Philippines — “Paano magiging tagapangalaga ang mismong sumira ng bahura? Hypocrisy ito. Hindi lang kalikasan ang pinapatay nila, kundi pati ang kabuhayan at pagkain ng pamilyang Pilipino.”

Reaksyon ito ni Dr. Jose Antonio Goitia sa planong nature reserve ng Beijing, sa pagsasabing “Walang karapatang magbantay sa dagat ang mga sumira nito”

Lalong lumalala ang kalagayan mga ma­ngingisda sa lantad na pagkukunwari ng China sa West Philippine Sea (WPS) gayung paraan lang ang pagtatatag ng nature reserve upang pagtakpan ang iligal na pag-okupa at pagsira sa marine ecosystem.

Nanawagan si Goitia ng pagkakaisa at pagkilos upang ipagtanggol ang karapatan ng mga mangingisdang Pilipino na napilitang maghanap ng trabaho dahil hindi na sapat ang yamang dagat na nakukuha nila para sa gasolina, lambat, at pagkain.

Gayundin ang pagtuligsa ni National Security Adviser Sec. Eduardo Año na mula 2016, may ebidensiya ng malakihang paghuli ng endangered species at pagkasira ng mga bahura na gawa ng mga mangingisdang Tsino, mga aktibidad na binanggit pa mismo ng Arbitral Tribunal

Nitong Martes, Setyembre 16, muling nag-init ang tensyon matapos magbanggaan ang barko ng Pilipinas at China sa Bajo de Masinloc.

Habang tinawag ng Beijing na “mapang-udyok” ang hakbang ng Maynila, mariin namang iginiit ng AFP at PCG na ito’y iligal na panghaharas sa loob ng ating Exclusive Economic Zone. Pati ang isang makataong misyon na magdadala ng gasolina at pagkain para sa mga mangingisda ay hinarang ng siyam na barkong Tsino.