EO sa Independent Commission for Infrastructure inilabas ng Palasyo
MANILA, Philippines — Inilabas na ni Pangulong Ferdinand Marcos Jr. ang Executive Order No. 94 na nag-uutos sa pagbuo ng ‘Independent Commission for Infrastructure’ (ICI) na mag-iimbestiga at hahabol sa mga nasa likod ng maanomalyang flood control projects.
Nakasaad sa EO na layunin ng komisyon na bigyang linaw ang mga report at alegasyon ng iregularidad, paglustay diumano ng pondo ng gobyerno at posibleng kurapsyon sa mga proyekto kontra baha, “which, if true, endanger the safety and security of the Filipino people, threaten the welfare of various communities, and erode public trust in government institutions.”
Binigyan-din ng kapangyarihan ang komisyon na magsagawa ng pagdinig, mag-imbestiga, kumalap, tumanggap ng ebidensya, at “evaluate evidence, intelligence reports, and information against all government officials and employees, and any other individual involved in anomalies, irregularities, and misuse of funds.”
Tulad ng pangako ng Pangulo, may kapangyarihan itong mag-isyu ng subpoena at magrekomenda ng hold departure order na pipigil sa pagtakas ng isang indibidwal na iniimbestigahan ng ICI.
Maari ring magmungkahi ng ‘preventive suspension’ para maiwasan ang tampering ng ebidensiya at maka-impluwensiya sa kaso. Inatasan din sila na maghain ng recomendasyon sa pagsasampa ng “criminal, civil, and administrative cases or actions against those responsible”.
Ayon pa sa EO, masyado nang nalapastangan ang kaligtasan ng taumbayan na paulit-ulit tinatamaan ng kalamidad at sobra-sobra na ang paghihirap.
- Latest
