‘Parang awa niyo na’

Pamilya Veloso umapela ng amnesty

MANILA, Philippines — Umapela kay Pangulong Ferdinand Marcos Jr. ang pamilya ni Mary Jane Veloso para gawaran na siya ng emnestiya.

Si Veloso ay nakapiit ngayon sa National Correctional for Women matapos na maiuwi dito sa bansa mula sa pagkakakulong sa Indonesia.

Sa isinumiteng petisyon ng pamilya ni Veloso sa Malakanyang, hiniling nila na bago sana ang State of the Nation Address (SONA) ng Pangulo ay igawad na ang amnestiya kay Mary Jane.

Ayon naman kay Palace Press Officer Atty. Claire Castro, hindi niya sigurado kung nakarating na sa Office of the President ang petisyon ng pamilya Veloso.

Kung wala naman aniyang malalabag na batas ay posibleng magkaroon ng positibong reaksiyon dito ang Pangulo lalo na at ikabubuti ng ating kababayan.

Magugunita na si Veloso ay nahatulan ng parusang kamatayan sa Indonesia matapos mahulihan ng ilang kilo ng ipinagbabawal na gamot subalit nakaligtas sa kamatayan matapos magkaroon ng bagong polisiya ang Indonesia na ang mga dayuhang nakapiit sa kanilang bansa ay pauwiin sa kanilang bansa para doon na pagdusahan ang kasalanan.