Bucks miangkon og luna sa NBA playoffs

CEBU, Philippines — Ang Milwaukee Bucks miangkon nang daan sa katapusang awtomatik nga luna sa NBA Eastern Conference playoffs sa wala pa sila miposte og makutas nga daog, 121-115, sud sa overtime batok sa Miami Heat kagahapon didto sa Kaseya Center sa Miami, Florida.

Bisan og unsa pa ang resulta sa ilang sangka batok sa Heat, ang Bucks garantisado na sa ikasiyam nilang sagunson nga pagtikang sa playoffs human ang labing sikit nilang karibal nga Atlanta Hawks gipilde sa New York Knicks, 121-105.

Kini nagpasabot nga ang Hawks wala nay puruhan nga moderetso og sud sa playoffs.

Aron makabira og luna sa postseason, ang Hawks mag-agi usa sa play-in tournament kauban ang Heat, Chicago Bulls ug Orlando Magic.

Si Giannis Antetokounmpo miharos og triple-double nga 36 puntos, 15 ka rebounds ug 10 ka assists alang sa Bucks samtang si Kevin Porter Jr. midugang og 24 puntos.

Nangu sa pilderong Heat mao si Bam Adebayo uban ang 21 puntos 12 ka rebounds ug lima ka assists.

Sa West, nagkasikit ang kumbati alang sa nahibiling upat ka puwesto sa playoffs sunod sa kwalipikado nang Oklahoma City Thunder ug Houston Rockets.

Kini human ang Memphis Grizzlies (46-32) ug ang Minnesota Timberwolves (46-32) mikulit na sab og krusyal nga mga daog.

Ang Grizzlies mitumba sa Detroit Pistons, 109-103, luyo sa pagpanginit ni Desmond Bane nga mibubo og 38 puntos uban ang pito ka rebouynds ug tulo ka assists. Nakakuha siya og dakong suporta gikan nilang Jaren Jackson Jr. ug Zach Edey nga nagkumboya;g 48 puntos.

Didto sa Philadelphia, ang Timberwolves mipahayag sa ilang tsansa nga makalayat sa sunod nga hugna sa torneyo human gipayaka ang 76ers, 114-109.

Si Anthony Edwards maoy bida sa Wolves uban ang 37 puntos, samtang si Rudy Gobert mitampo og 23 puntos, 19 ka rebounds, tulo ka blocks, ug duha ka steals.