Bato hindi puwedeng arestuhin sa Senado - Chiz

MANILA, Philippines — Hindi maaring arestuhin sa loob ng Senado si Sen. Ronald “Bato” Dela Rosa kung mayroong sesyon.

Ayon kay ­Senate President Francis “Chiz” Escudero, maaaring manatili sa Senado si Dela Rosa hanggang maubos nito ang mga “legal remedies” na makapipigil sa pag-aresto sa kanya.

Pero agad ding nilinaw ni Escudero na wala pa namang natatanggap na arrest warrant ang Senado mula sa International Criminal Court o ICC.

Matatandaang sinabi ni Dela Rosa na hihingi siya ng proteksyon sa Senado sakaling maglabas ng warrant of arrest laban sa kanya.

Binanggit naman ni Escudero ang mga nakaraang kaso ng mga senador na nagkanlong sa Senado sa gitna ng warrant of arrest laban sa kanila.

“Hindi nakabase sa batas pero nakabase sa tinatawag na institutional courtesy—hindi papayagan ng Senado [na] arestuhin ang sinumang miyembro niya sa loob ng Senado lalo na kung may sesyon,” ani Escudero.

Sinabihan din ni Escudero si Dela Rosa na tutulungan ito ng Senado sa mga kailangang ­remedyong legal sakaling maglabas ng warrant of arrest ang ICC.