Misis ni Roque namumurong ipaaresto ng Quadcomm

MANILA, Philippines — Binalaan nitong Lunes ni Antipolo City Rep. Romeo Acop si Mylah Roque, misis ni dating Presidential Spokesman Harry Roque, na hindi mangingimi ang Quad Committee ng Kamara na mag-isyu ng warrant of arrest kapag nabigo pa itong dumalo sa imbestigasyon sa illegal na operasyon ng Philippune Offshore and Gaming Operations (POGOs).

“Pwede naman siya pumunta at magsabi na I refuse to answer dahil ma self-incriminate siya…Kung ‘di siya pupunta, isa ‘yan sa pinakamabigat sa rules namin na pwede siyang ma-cite in contempt, for not respecting our invitation,”pahayag ni Acop, Vice Chairman ng Quad Comm sa panayam ng TeleRadyo Serbisyo.

“Kung hindi mo i-honor ‘yung subpoena, we will request that an arrest order be issued against her. If the quad committee schedules a hearing and she does not show up despite the invitation, we will issue an order to cite her in contempt,” ayon kay Acop.

Sa liham ng misis ni Roque sa mega panel ng Kamara, sinabi nito na hindi siya makakadalo sa pagdinig dahil nagpapagamot umano siya sa kaniyag karamdaman sa Singapore bagaman hindi nito tinukoy kung ano ang kaniyang sakit.

Una nang pinatawan ng contempt ang mister nitong si Harry dahil sa hindi pagdalo at hindi pagsusumite ng tax returns, rekord ng negosyo at Statement of Assets Liabilities and Net Worth (SALN).

Kinukuwestiyon ng Quad Comm si Harry dahil mula sa P125,000 investment nito noong 2016 ay lumobo ito sa P125-M noong 2018 na hinihinalang dahilan sa pagkakasangkot sa illegal na POGOs.

Samantalang sa halip na magpaliwanag sa komite ay panay ang atake ni Harry sa Quad Commi habang sa kaniyang social media post ay binira naman ni Mylah si Surigao del Norte Rep. Robert Ace Barbers, Chairman ng Quad Comm na abusado umano bagay na itinanggi naman ng mambabatas.

Nilinaw naman ni Barbers na ipinatatawag ng Quad Committee si  Mylah upang hingan ng paliwanag sa paglagda nito sa lease agreement sa Chinese nationals na iniuugnay sa illegal na POGO complex sa Bamban, Tarlac.

Kung hindi dadalo sa pagdinig ay kapwa makukulong ang mag-asawa sa detention facility ng Kamara.