PNP kinalampag: Quiboloy, Guo ‘di pa naaaresto

MANILA, Philippines — Kinalampag na ni Kabataan Partylist Rep. Raoul Manuel ang Philippine National Police (PNP) dahil sa kabiguang masakote ang dalawang high profile fugitives na sina Kingdom of Jesus Christ (KOJC) founder Pastor Apollo Quiboloy at dismissed Bamban, Tarlac Mayor Alice Guo.

Sa pagdinig ng House Committee on Appropriations kaugnay ng panukalang P278.4 bilyong pondo ng Department of Interior and Local Government (DILG) at mga ahensiyang hawak nito para sa taong 2025, sinabi ni Rep. Manuel na naisyuhan na ng warrant of arrest sina Quiboloy at Guo pero bigo pa rin ang mga itong maaresto ng mga operatiba ng PNP.

Una nang sinabi ng bagong talagang si Police Regional Office (PRO) 11 Director P/Brig. Gen. Nicolas Torre III na nasa Prayer Mountain lamang umano ng KOJC si Pastor Quiboloy sa Davao City.

Ayon kay Manuel, kapag maliliit na personalidad o mga ordinaryong tao ay mabilis lamang masakote ng PNP pero kapag mga big-time umano na tulad nina Quiboloy at Guo ay tila hindi ang mga ito mahuli.

May halos limang buwan na matapos maisyuhan ng Senado ng arrest order si Quiboloy bukod dito ay naisyuhan din ng warrant of arrest ng Pasig Regional Trial (RTC) na nasa apat na buwan na dahil sa kasong human trafficking.

Samantala si Guo na sinibak na sa pagka-mayor ay hindi pa rin matunton.

Tiniyak naman ni PNP Chief P/Brig Gen. Rommel Marbil na nagpapatuloy ang kanilang imbestigasyon at surveillance operations para maaresto sina Quiboloy at Guo.