Quiboloy nasa ‘tabi-tabi’ lang – DILG

MANILA, Philippines —  Naniniwala si Interior and Local Government Secretary Benhur Abalos na nasa ‘tabi-tabi’ lang ang founder ng Kingdom of Jesus Christ (KOJC) na si Pastor Apollo Quiboloy at lumiliit na ang ginagalawan nito.

“There is always a lot of possibility na maaring kung saang parte sila ng mundo, pero sa aming nakikita sa ngayon, nandiyan lang ‘yan. Nandito lang ‘yan sa Pilipinas,” ani Abalos.

Ayon kay Abalos, kung talagang inosente si Quiboloy wala itong dahilan upang magtago at  mas makabubuting sumuko at humarap sa korte.

“Pastor, alam ko naman na you have your reasons. Sinasabi mo you’re innocent. Just surrender. I-present mo ito sa court of law. This is the time to present your evidence and your lawyers,” ani Abalos.

Mas magiging magaan at maayos anya ang proseso kung makikipagtulungan si Quiboloy sa mga awtoridad.

Samantala, pinag-aaralan na ngayon ng Philippine National Police (PNP) ang pagdadagdag ng reward money o pabuya para sa agarang pagdakip kay Quiboloy.

Sa pulong balitaan sa Camp Crame kahapon, sinabi ni PNP Public Affairs Office Chief Police Col. Jean Fajardo, na ikinokonsidera na rin nila na dagdagan pa ang P10 milyon na mula sa ilang private citizens.

Gayunman, sinabi ni Fajardo na kailangan pa ring dumaan sa tamang proseso alinsunod sa auditing, budgetary rules, at guidelines.

Sinabi ni Fajardo na hindi maikakaila na positibo ang tugon sa isyu matapos inanunsyo ni Abalos ang paglalabas ng ?10M reward money.

Dahil dito, maraming tawag na rin ang  natatanggap ng PNP hinggil sa lokasyon ni Quiboloy subalit ang lahat aniya ay dumaraan sa beripikasyon.