Chinese citizens hihigpitan sa pagkuha ng Philippines visa - DFA

MANILA, Philippines — Magpapatupad ang gobyerno ng Pilipinas ng mas mahigpit na proseso sa pagbibigay ng visa para sa mga Chinese simula ngayong linggo, ayon sa Department of Foreign Affairs.

Sinabi ni Department of Foreign Affairs (DFA) Undersecretary Gary Domingo na ito ay dahil sa mga napaulat na “fraudulently-obtained passports at visas” na nag­resulta ng illicit entry at overstay sa bansa.

“A major challenge is submitting fake documents, particularly from the Chinese side,” ani Domingo.

“To help remedy this, we are actually looking at a best practice used by other foreign embassies such as Japan, South Korea, US and UK — and they also require applicants to submit a social insurance certificate,” dagdag ni Domingo.

Sinabi rin ni Domingo na patuloy nilang ire-require ang “presentation of proof for financial capacity with employment certificate at bank statements,” ngunit mas magiging vigilante sila sa “pagsusuri” sa bank statement at account ng mga aplikante.

Nang tanungin kung bakit kailangang magpatupad nang paghihigpit, sinabi ni Domingo na “medyo confidential. Basta marami.”

Iginiit din ni Domingo na ang pagbabago sa patakaran ng gobyerno ay “hindi kinakailangang nauugnay sa iba pang mga alalahanin sa pambansang seguridad.”

“This is also for the good of the Chinese because again — itong mga Pogo (Philippine Offshore Gaming Operators) na nakalusot, who are their victims? Mga kapwa Chinese,” paliwanag niya.