PNP, NBI pinakikilos: Quiboloy hanapin, arestuhin!

MANILA, Philippines — Hindi na dapat magpatumpik-tumpik pa ang mga operatiba ng Philippine National Police (PNP) at National Bureau of Investigation (NBI) para hanapin at ipatupad na ang warrant of arrest laban kay Kingdom of Jesus Christ (KOJC) Pastor Apollo Quiboloy.

Sa press briefing hindi naitago ni House Deputy Speaker at Quezon 2nd District Rep. David Sua­rez ang pagkadismaya dahil mahigit isang buwan na simula ng mag-isyu ng warrant of arrest ang korte sa kasong human trafficking, child at sexual abuse and ay hindi pa rin mahuli ng mga awtoridad si Quiboloy.

Nitong Abril 6 ay nagpalabas ng warrant of arrest si Pasig Regional Trial Court (RTC) Branch 159 Judge Rainelda Estacio-Montesa laban kay Quiboloy.

Bukod dito, Marso 19 ay inisyuhan din ng arrest order ng Senado si Quiboloy kaugnay ng ‘sex crimes‘ na kinasasangkutan ng pastor.

Una nang sinabi ni da­ting Pangulong Rodrigo Duterte na si Quiboloy ay nasa Davao lang. Sinasabing si Quiboloy ay nasa 8 hektaryang Mt. Tamayong Prayer Mountain na pag-aari nito sa lungsod ng Davao.

Sinabi ni Suarez na nagtataka siya kung bakit sa kabila ng warrant of arrest na inisyu kay Quiboloy ay magpahanggang ngayon ay hindi pa rin ito matagpuan at maaresto ng mga awtoridad.

Inihayag ni Suarez na ang pagmamatigas ni Quiboloy na lumantad ay nagpapakita lamang na wala itong respeto sa mga institusyon ng pamahalaan at maging sa batas.

Muling nanawagan si Suarez sa mga law enforcement agencies na iimplementa na ang warrant of arrest, hanapin at ares­tuhin si Quiboloy upang gumulong na ang proseso ng batas laban dito.