Pinsala sa PCG ship aabot sa P2-P3 milyon

MANILA, Philippines — Kinumpirma ng Philippine Coast Guard (PCG) na aabot sa P2 milyon hanggang P3 milyon ang halaga ng pinsalang tinamo ng kanilang barko na binomba ng tubig ng mga tauhan ng Chinese Coast Guard (CCG) ka­makailan habang nagpapatrulya at nagsasagawa ng humanitarian mission sa West Philippine Sea (WPS).

Sa isang media briefing kahapon, sinabi ni Commodore Arnaldo Lim, acting commander ng PCG Manila at Central Luzon Districts, na ang pamahalaan ang sasagot sa pagpapagawa ng BRP Bagacay, na dumaong na sa Cunanan Wharf.

Nabatid na direktang tinamaan ng pinakawalang tubig ng CCG ang LED panel ng barko kaya’t nawasak ito.

Nasira rin umano ang canopy at railings ng tulay ng barko, gayundin ang ilang navigational equipment, gaya ng satellite compass.

Ayon kay Lim, kaagad na ring sisimulan ng Coast Guard Commander Fleet ang pagkukumpuni sa kanilang barko. 

Matatandaang bukod sa BRP Bagacay, napinsala rin dahil sa pambo­bomba ng tubig ng CCG ang starboard astern ng BRP Datu Bankaw na pagmamay-ari naman ng Bureau of Fisheries and Aquatic Resources (BFAR) at siyang kasama ng BRP Bagacay sa pagpapatrulya at pagdaraos ng humanitarian mission sa WPS noong Abril 30.

Kasalukuyan nang isinasailalim ng PCG ang BRP Bagacay sa structu­ral integrity upang matukoy kung alin-alin pang bahagi nito ang kailangang kumpunihin.