China binomba uli ng tubig 2 barko ng Pinas, wasak!
MANILA, Philippines — Nawasak ang dalawang barko ng Pilipinas na naatasang magpatrulya at maghatid ng fuel at food supplies sa mga magsasaka sa Bajo de Masinloc matapos na pagtulungang bombahin ng tubig ng mga barko ng China Coast Guard (CCG) kahapon.
Sa isang pahayag, sinabi ni Philippine Coast Guard-West Philippine Sea (PCG-WPS) spokesperson Commodore Jay Tarriela na pinagtulungang bombahin ng water cannons ng tatlong barko ng CCG na may bow numbers na 3305, 3105 at 5303, ang 44-meter multi-role response vessel na BRP Bagacay (MRRV-4410) ng PCG at ang BRP Bankaw (MMOV-3004) ng Bureau of Fisheries and Aquatic Resources (BFAR).
Naganap ang pambobomba ng tubig ganap na alas-9:53 ng umaga kahapon habang isinasagawa ng mga ito ang misyon na maghatid ng fuel at food supplies sa mga mangingisda.
Sinabi pa ni Tarriela na sa kanilang pagpapatrulya ay nakaranas din ang mga barko ng Pilipinas ng ‘dangerous maneuvers at obstruction” mula sa apat na barko ng CCG at anim na Chinese Maritime Militia (CMM) vessels.
“At approximately 9:53 (a.m.), when the BFAR vessel was about 12 nautical miles from Bajo de Masinloc, CCG-3305 utilized its water cannon, directly hitting the starboard astern of the BFAR vessel,” ani Tarriela, sa isang pahayag. “When the PCG vessel was approximately 1,000 yards east-southeast of Bajo de Masinloc, CCG-3105 and CCG-5303 employed their jet stream water cannons, targeting the PCG vessel from both sides, resulting in damage to the railing and canopy.”
“This damage serves as evidence of the forceful water pressure used by the China Coast Guard in their harassment of the Philippine vessels,” aniya pa.
Samantala, iniulat din naman ni Tarriela na naglagay ring muli ang China ng 380-metrong floating barrier sa buong entrada ng shoal, upang hindi na mapasok ang lugar.
Tiniyak din naman ni Tarriela na sa kabila ng dinanas na harassment at provocative actions mula sa CCG, nanatili sa lugar ang mga barko ng PCG at BFAR at ipinagpatuloy ang kanilang pagpapatrulya.
Aniya, “Despite the harassment and provocative actions of the Chinese Coast Guard, both the PCG and BFAR vessels stood their ground and continued their maritime patrol. They were not deterred and will persist in carrying out their legitimate operations to support Filipino fishermen and ensure their safety.”
- Latest