Exam leak sa WVSU: Higit 20K examinees, uulit ng admission test
MANILA, Philippines — Nakatakdang kumuhang muli ng admission test sa West Visayas State University (WVSU) ang mahigit sa 20,000 examinees nito.
Ito’y matapos umanong makumpirma ng mga opisyal ng naturang unibersidad sa Western Visayas region, ang ulat na may mga katanungan sa admission test, na nag-leaked nga sa ilang examinees.
Sa isang abiso noong Marso 15, inianunsiyo ng WVSU administration na nagkasundo silang ipawalang-saysay ang admission test na isinagawa noong Marso 10 lamang matapos na lumitaw sa imbestigasyon na nagkaroon ng leak ng examination items, na kinasasangkutan ng mga di pa natukoy na indibidwal.
Nabatid na aabot sa kabuuang 20,925 aplikante ang maaapektuhan ng naturang desisyon.
“There is reason to believe that the integrity of the examination has been compromised,” bahagi ng abiso.
Anito pa, “While the administration has moved forward through this difficult decision, we assure the public that the ongoing investigation will continue to proceed to identify accountable individuals for this breach.”
Nakatakda namang ianunsiyo ng pamunuan ng WVSU sa mga susunod na araw ang petsa kung kailan isasagawa ang retake ng admission exams, sa iba’t ibang testing centers.
- Latest
