9 patay, 16 sugatan matapos magnitude 6.8 na lindol sa Sarangani
MANILA, Philippines — Umakyat pa ang bilang ng mga na-injure matapos ang malakas na magnitude 6.8 na lindol na tumama sa probinsya ng Davao Occidental — bagay na pumatay na sa siyam, ayon sa National Disaster Risk Reduction and Management Council (NDDRMC).
Ika-17 ng Nobyembre nang yanigin ng lindol ang epicenter ng Sarangani. Una na itong itinaya ng Phivolcs na umabot sa magnitude 7.2 ang earthquake bago ito ibaba sa 6.8.
Narito ang pinakahuling tala ng casualties ng lindol, ayon sa huling situation report ng NDRRMC ngayong Martes:
- patay: 9
- sugatan: 16
- apektadong populasyon: 16,293
Sa kabutihang palad, wala pang naitatalang nawawala at nasa loob ng evacuation centers sa ngayon.
Una nang naitalang umabot sa Intensity VII (destructive) ang lindol sa Glan, Sarangani.
"A total of 1,544 damaged houses are reported in Region 11, Region 12," sabi pa ng NDRRMC patungkol sa Davao Region at SOCCSKSARGEN.
Wala pang inilalabas na mga datos pagdating sa halaga ng pinsala sa sektor ng agrikultura imprastruktura. Gayunpaman, 202 na ang sinasabing napinsalang infrastructure.
Umabot na sa P11.61 milyong halaga ng ayuda sa porma ng family food packs, family kits, at pinansyal na tulong ang naibibigay sa ngayon sa Regions 11 at 12.
Lunes lang nang pangunahan ni Department of Social Welfare and Development (DSWD) Undersecretary for Innovations Edu Punay ang pamamahagi ng relief assistance sa mga empleyado ng Gaisano Grand Koronadal mall, na isa sa mga lubhang naapektuhan ng lindol.
"Over 400 mall employees received Php2,000 each under the DSWD’s Assistance to Individuals in Crisis Situation (AICS) program in addition to two boxes of family food packs (FFPs)," sabi ng Department of Social Welfare and Development.
- Latest
