Paggamit ng AI Image App, bawal sa DND at AFP

MANILA, Philippines — Ipinagbabawal ni Department of National Defense (DND) Secretary Gilbert Teodoro sa kanyang mga tauhan at sa Armed Forces of the Philippines (AFP) ang paggamit ng Artificial Intelligence (AI) generator app.

Ang kautusan ay sa kabila ng nauusong paglikha ng “AI portrait” ng mga user sa mga social media network gamit ang naturang app.

“All DND and AFP personnel are directed to refrain from using Al photo generator applications, and practice vigilance in sharing information online,” ani Teodoro.

Sa nasabing app, nagsusumite ng 10 larawan ang mga user na pinagsasama-sama ng app para lumikha ng isang “digital person” na kambal ng totoong indibidual.

Sa isang memorandum na may petsang Oktubre 14, 2023 pinaliwanag ng kalihim na ang mistulang inosenteng AI app ay maaring magamit para lumikha ng pekeng profile na pwedeng humantong sa identity theft, social engineering, phishing attacks, at iba pang malisyong aktibidad.

Babala pa ng kalihim, may naiulat nang kahalintulad na kaso, kaya dapat maging maingat sa pagbibigay ng impormasyon online.

Paala ni Teodoro sa mga tauhan ng DND at AFP na siguruhing naayon sa lahat ng “values” at polisiya ng Kagawaran ang kanilang mga aksyon.