10 papuntang Malaysia nasagip ng Philippine Navy sa human trafficking

MANILA, Philippines — Nasagip ng pinagsanib na mga elemento ng security forces ang 10 katao na umano’y biktima ng human trafficking na patungong Malaysia.

Base sa report ng Naval Forces Western Mindanao (NFWM), ang mga biktima ay nailigtas sa pantalan ng Brgy. Baliwasan, Zamboanga City kamakailan.

Gayunman, hindi tinukoy ang mga pangalan ng mga nasagip na biktima para na rin sa kanilang seguridad laban sa mga human traffickers na patuloy pang pinaghahanap ng mga awtoridad.

Lumilitaw na ang modus ng mga suspek ay idaan sa backdoor channel ng southern Mindanao ang mga binibiktima ng mga ito.

Ang mga nasagip ay isinailalim sa debriefing habang pinaghahanap na ang illegal recruiter ng mga ito at iba pang mga kasabwat.