NTF-ELCAC walang kontrol sa budgetng barangay developmentprogram

MANILA, Philippines — Taliwas sa sinasabi ng oposisyon, naninindigan ang National Task Force to End Local Communist Armed Conflict (NTF-ELCAC) na wala itong kontrol sa pondong inilalaan para sa Barangay Development Program (BDP).

Ayon kay National Security Adviser at NTF-ELCAC Vice Chairman Hermogenes Esperon Jr., ang bilyong pondo ng BDP ay hindi hawak ng grupo sa halip ito ay kasama sa pondo ng ibang ahensiya ng pamahalaan na silang naatasang magsagawa ng mag proyekto sa barangay gaya ng farm-to-market road, school buil­dings at livelihood projects.

Sa ilalim ng 2022 national budget, ang BDP na itinuturing na flagship project ng Duterte administration, ay makakakuha ng P28.1 bilyon o mas mataas ng P11.66 bilyon kaysa sa pondo ngayong 2021.

Mula sa 822 nitong 2021, aabot na sa 1,404 barangay ang isasama sa BDP na kung saan ang bawat isa ay mabibigyan ng mga proyekto na hindi lalagpas sa P20 milyon. Ang mga barangay na ito ay itinuturing na malaya na mula sa impluwensiya ng rebeldeng CPP at NPA.

Ipinaliwanag ni Esperon na ang tanging trabaho lamang ng NTF-ELCAC ay i-monitor kung ang mga proyektong inihain ay naisasagawa ng tama at nasa oras.

Niinaw din ni Esperon na walang palakasan sa pagpili ng barangay dahil dumaan ang mga ito sa mahabang proseso. Hanggang nitong Setyembre 3, umaabot na sa 99.3 porsiyento ng pondo para sa BDP ang nailalabas na ng DBM na direktang ibinigay sa bawat probinsiya at siyudad na sumasakop sa barangay.