'5-year high': Pamilyang Pinoy na nagsasabing mahirap sila, tumaas sa 54%

MANILA, Philippines — Umakyat ang bahagi ng mga pamilyang Pilipino na nagsasabing sila'y mahirap, ayon sa inilabas na 2019 fourth quarter survey ng Social Weather Stations, Huwebes. 

"Ito'y 12% mas mataas sa 42% na naitala noong Setyembre 2019," sabi ng SWS sa Inggles.

Ito na ang pinakamataas na self-rated poverty rate mula nang maitala ito sa 55% noong Setyembre 2014.

Sa kabila nito, bumaba ang self-rated poverty rate mula 48% noong 2018 patungong 45% para sa kabuuan ng 2019.

Ang resulta ay nanggaling sa pag-aaral na kanilang ginawa mula ika-13 hanggang ika-16 ng Disyembre noong nakaraang buwan.

Tinatayang nasa 13.1 milyon ang bilang ng mga "self-rated poor families" noong Disyembre, na nagmula sa 10.3 milyon noong Setyembre.

Noong Hunyo, nasa 45% lang ito habang 38% lang ito noong Marso.

Noong Disyembre 2019, sinabi rin ng SWS na nasa P12,000 self-rated poverty threshold (national median SRPT), o ang minimum na buwanang budget na kailangan ng isang pamilya para masabing hindi sila mahirap.

"Ang 12-puntos na pagtaas ng nationwide self-rated poverty sa nasabing kwarto ay dahil sa pagtaas nito sa lahat ng lugar," dagdag pa nila.

Narito ang self-rated poverty sa mga sumusunod na lugar:

• Metro Manila (41%)
• Balance Luzon (47%)
• Visayas (67%)
• Mindanao (64%)

Bagong salta sa kahirapan

Dagdag pa ng survey, sa 54% ng pamilyang nagsasabing mahirap sila, 7% (1.6 milyong pamilya) rito ang ngayon lang naging mahirap (newly poor). 

Sinabi ng respondents na hindi nila tinitignan bilang mahirap ang kanilang sarili isa hanggang apat na taon ang nakalilipas.

Nasa 7% (1.8 milyong pamilya) din sa bilang na 'yan ang nagsasabing hindi sila mahirap sa nakaraang limang taon pataas (usually poor).

Nasa 40% (9.7 milyong pamilya) naman ang nagsasabing hindi pa nila naranasang makaangat sa kahirapan (always poor).

Sa December survey, lumalabas din na sa 46% ng self-rated non-poor families, 10% ang dating newly non-poor habang 15% ang dating usually non-poor. 

Nasa 21% naman ng pamilya ang hindi kailanman nakatikim ng kahirapan (always non-poor).

'Self-rated food poverty' tumaas din

Samantala, nasa 35% naman ng mga pamilya ang nagsasabing mahirap sila kung pagkain ang pagbabatayan, bagay na tinawag ng SWS bilang "food-poor."

"Ito'y anim na puntos na mas mataas sa 29% noong Setyembre 2019," sabi pa ng SWS.

Merong estimated na 8.6 milyong pamilyang Pilipinong nagsasabing food-poor sila nitong Disyembre, na mas mataas sa 7.1 milyon noong Setyembre.

Para sa kabuuang 2019, sinasabing nasa 31% ang proportion ng food-poor families, kumpara sa 33% noong 2018.

Sinasabi namang nasa P5,000 ang national median self-rated food poverty threshold, o ang minimum na buwanang budget na kailangan ng pamilya para sabihing hindi pang-mahirap ang kanilang pagkain noong Disyembre.