Ninja cop ipinaaaresto

MANILA, Philippines – Pinatawan ng contempt at pinaaaresto ng Senado si Senior Police Office 1 Ronald Santos, isa sa 13 opisyal ng Philippine National Police na tinatawag na “ninja cops” na inaakusahang sangkot sa recycling ng ilegal na droga.

Si Senate President Vicente “Tito” Sotto III ang naghain ng mosyon para i-contempt si Santos na sinigundahan naman ni Senate Minority Leader Franklin Drilon at Senator Richard Gordon, chairman ng Senate Blue Ribbon committee.

Partikular na hinanap ni Gordon si Santos na  mahalaga aniya sa isinasagawa nilang imbestigasyon.

Sinabi ni Gordon na pinadalhan na nila ng subpoena si Santos na napakahalaga sa kaso pero hindi ito nagpakita sa Senado. Inutos na ng Chairman ang pagdakip kay Santos para maiprisinta ito sa pagdinig.

Ipinagtanggol naman ni Senate President Vicente “Tito” Sotto III ang karapatan ng Senate Blue Ribbon Committee na imbestigahan kahit anong isyu.

Bagaman at hindi pinangalanan, halatang patungkol sa naging pahayag ni Presidential Spokesperon Salvador Panelo ang pahayag ni Sotto.

Sinabi ni Sotto na may isang opisyal ng gobyerno na kumukuwestyon sa paginig ng Senado tungkol sa Good Conduct Time Allowance (GCTA) law pero nauwi sa ibang isyu ang imbestigasyon.