Pamilyang tinitignan ang sariling mahirap 'record low,' sabi ng SWS

MANILA, Philippines — Lumalabas na 38% o 9.5 milyon ng mga pamilyang Pilipino ang tinitignang mahirap sila sa unang kwarto ng 2019, sabi ng Social Weather Stations kagabi.

Ito'y apat na puntos na mas mababa sa dating record-low na 42% noong Setyembre 2016 at Marso 2018.

"The new record-low Self-Rated Poverty score is a continuing recovery from the 10-point rise within the first three quarters of 2018," sabi ng SWS.

(Ang bagong record-low ay bahagi ng pagbawi mula sa 10-puntong pag-akyat sa unang tatlong kwarto ng 2018).

Pinakamababa rin sa kasaysayan ang mga itinuturing ang sariling pangmahirap ang kinakain o "food poor" sa 27%.

Mas mababa ito ng dalawang puntos mula sa dating record-low na 29%.

Ginamit bilang self-poverty threshold ang P10,000 o ang buwanang kita na kailangan para hindi matawag na mahirap ang sarili.

Isinagawa ang pag-aaral mula ika-28 hanggang ika-31 ng Marso 2019 gamit ang harapang panayam sa 1,440 katao.

Kumuha ng 360 respondents mula Balance Luzon, Metro Manila, Visayas at Mindanao.

15.3% pamilya 'umahon sa kahirapan'

Sa mga pamilyang hindi ipinapalagay ang sarili bilang mahirap (62%), lumalabas na 15% sa kanila ang mahirap isa hanggang apat na taon pa lang ang nakalilipas.

Lumalabas naman sa pag-aaral na 20% sa kanila ay mahirap limang taon pataas ang nakalilipas.

Bumaba sa lahat ng lugar

Nakitang bumaba ang self-rated poverty sa lahat ng lugar ng bansa, at record-low din sa Mindanao.

Ngayong Marso 2019, umani ng 35% sa Balance Luzon, 28% sa Metro Manila, 55% naman sa Visayas at 37% naman sa Mindanao.

Mas mababa ng isang puntos ang nakuha ng Mindanao sa dati nitong all-time low na 38%.

Bumaba rin ang food poverty sa lahat ng lugar, kung saan record-low sa Mindanao at Balance Luzon.