20% discount sa pasahe, bilihin hiling ng single parents

MANILA, Philippines — Gaya ng mga senior citizens at persons with disabilities, humiling ang isang grupo ng solo pa­rents na mabigyan din ng 20-porsiyentong diskuwento sa pamasahe at iba pang pangunahing bilihin.

Bukod sa mga benepisyong natatanggap ng mga solong magulang sa ilalim ng Solo Parents Welfare Act, kailangan pa ng mga single parent ng karagdagang suporta mula sa pamahalaan, sabi ni Carina Javier, national president ng Federation of Solo Parents dito sa bansa.

“’Yung 20-percent discount sa mga basic commodities, tuition fee, sa hospital expenses, laboratory, sa mga restaurants, sa pamasahe,” sabi ni Javier.

Sa ilalim ng batas, nakatatanggap ang mga solo parent ng karagda­gang 7-day leave, scho­larship para sa mga anak, housing benefits at medical assistance.

Noong nakaraang buwan ay nagpasa ng ordinansa ang lokal na pamahalaan ng Quezon City na bigyan ng 20-porsiyentong diskuwento sa mga kainan sa lungsod ang mga magpapakita ng solo parent ID.

Hiling ng grupo ni Javier na amiyendahan ang batas at mas bigyang suporta ang mga single parent sa gitna ng patuloy na pagtaas ng presyo ng bilihin sa bansa.

Mayroong 18 panukala ngayon sa Kamara at 5 naman sa Senado upang amiyendahan ang naturang batas para sa mga single parent.