Malacañang wala raw alam sa dismissal ni Mayor Junjun

MANILA, Philippines – Itinanggi kahapon ng Malacañang na may kinalaman ito sa ginawang pagsibak ng Ombudsman kay Makati Mayor Junjun Binay at 19 pang opisyal kaugnay sa diumano’y maanomalyang Makati City Hall Building II.

Ayon kay Deputy Pre­sidential Spokesperson Abigal Valte, independent ang Ombudsman at ito ang mas makakasagot ng akusasyon ng kampo ni Binay na minadali ang pagpapalabas ng dismissal order.

“Una po, hindi na po kami dapat pang magkomento diyan kasi separate and independent po ang opisina ng Ombudsman mula ho sa tanggapan ng ating Pangulo, so sila na lang po ang pwedeng sumagot ‘non. We do not have a hand in the processes of the Ombudsman, so sila po ‘yung mas makakasagot doon sa mga statement ‘nung pamilya Binay,” ani Valte.

Ipinauubaya na rin ng Malacañang sa Commission on Elections ang plano ni Binay na ituloy ang paghahain ng certificate of candidacy.

Pero ipinaalala ni Valte na isa sa mga magiging balakid para kay Binay ang kalakip sa kautusan na “perpetual disqualification” na makapagsilbi sa anumang tanggapan ng gobyerno.