Kaso vs Sulpicio binuhay ng SC
MANILA, Philippines - Makaraang paboran ng Supreme Court (SC) Second Division ang motion for reconsideration na inihain ng Office of the Solicitor General at Public Attorney’s Office (PAO), muling binuhay ang kasong kriminal laban sa may-ari ng Sulpicio Lines na si Edgar Go kaugnay ng lumubog na MV Princess of the Stars noong 2008 na ikinasawi ng halos 800 indibidwal.
Ayon kay Atty. Persida Rueda-Acosta, chief ng PAO, kinasuhan si Go dahil ito ang sinasabing nagma-manage ng barko at ito ang pumayag na maglayag ang MV Princess of the Stars kahit pa signal number 3 na.
Pinagkokomento ngayon ng korte si Go sa loob ng 10 araw. Una nang dinismis ng Court of Appeals (CA) ang naturang criminal case kay Go.
Sinabi ni Acosta na nakakita sila ng pag-asa na mabibigyan ng hustisya ang kaso dahil sa naging desisyon ng SC.
Bukod kay Go, nakasuhan din noon ang kapitan ng barko bagama’t hindi naging saklaw ng criminal case ang ibang may-ari ng Sulpicio.
Tanging sa civil case lamang nahabla ang lahat ng may-ari at kapitan.
Walang nabilanggo sa mga kinasuhan dahil ang reckless imprudence ay may piyansa.
Magugunitang sa pananalasa ng bagyong Frank noong 2008, galing sa Manila Port ang M/V Princess of the Stars nang maglayag patungong Cebu kahit may nakataas nang babala ng bagyo.
- Latest
