Pabahay sa Mindanao binuksan ni VP Binay
MANILA, Philippines - Habang patuloy na sinisiraan si Vice President Jejomar Binay ng kanyang mga kalaban, determinado pa rin siyang gampanan ang kanyang tungkulin bilang pangalawang pinakamataas na opisyal ng bansa.
Kasabay nito, binisita niya ang Sarangani, Sultan Kudarat, North at South Cotabato, at ang lunsod na ito sa kanyang three-day sortie sa rehiyon.
Dumating dito si Binay noong Lunes at dinalaw ang city public market. Sinamahan siya rito nina eight-division boxing champion at Sarangani Rep. Manny Pacquiao, at Mayor Ronnel Rivera sa isang boodle fight.
Mula dito, dumiretso ang Bise Presidente at ang kanyang entourage sa Lagao National High School para dumalo rito bilang panauhing tagapagsalita.
Si Binay na tagapangulo ng Housing and Urban Development Coordinating Council (HUDCC) ay nagtungo rin sa Tupi, South Cotabato para magsagawa ng site inspection sa Bagong Buhay Resettlement Project at makipagdayalogo sa mga benepisyaryo.
Sa sumunod na araw, nakipagkita si Binay sa mga lokal na lider sa Sultan Kudarat at South Cotabato at ilang bayan.
Pinasinayaan din niya ang Office of Senior Citizens’ Affairs (OSCA) center sa Surallah town, South Cotabato at namigay ng mga wheelchairs at ibang medical equipment.
Noong Miyerkules ng umaga, nagtungo si Binay sa Plaza Heneral Santos at Carlos P. Garcia Park at nagsagawa ng 12-round brisk walk kasama sina Pacquiao, Rivera at Valenzuela Rep. Sherwin Gatchalian.
Kasunod nito, dinalaw ng Bise Presidente ang burol ng OFW na si Maribel Hipolito at nagpahayag ng pakikiramay sa pamilya nito.
“Alam po ninyo itong si Maribel, namatay sa aksidente ito. Ngayon ko lang nalaman na may pinagagamot siya sa kanyang breast. Ang report sa amin dito, papunta siya sa final check up sa ospital nang mangyari yung aksidente,” sabi ni Binay. “Ito po ay member ng OWWA (Overseas Workers Welfare Administration). Ang problema lang, hindi siya nakapag-renew ng membership,” dagdag ni Binay na siya ring Presidential Adviser on OFW Concerns.
Sinabi ni Binay na makikipag-ugnayan ang kanyang opisina sa Department of Foreign Affairs at OWWA para matignan kung makakatanggap si Hipolito ng end of service benefits at insurance mula sa employer nito.
Binanggit din ni Binay na ang pamilya ni Hipolito ay tatanggap ng P20,000 burial assistance mula sa Social Security System (SSS) at death benefit na katumbas ng kabuuang halaga ng kontribusyon nito.
Namatay si Hipolito sa Gizan noong Mayo 6 nang banggain ng isang trailer truck ang sinasakyan niyang taxi. Papuwi na sana siya sa kanyang bahay pagkatapos magpa-check up sa King Fahad Hospital.
- Latest
