MMDA, LTFRB mag-uulat sa MM mayors sa isyu ng trapik

MANILA, Philippines - Para tuluyang resolbahin ang girian sa pagitan ng Metropolitan Manila Development Authority (MMDA) at Land Transportation Franchi­sing Regulatory Board (LTFRB) hinggil sa inisyu ng huli na memorandum circular,  inaasahang muli na namang maghaharap- harap ngayon ang mga Metro Manila mayors at si LTFRB Chairman Winston Ginez.

Ito ang inihayag kahapon ni MMDA Assistant General Manager for ope­rations Emerson Carlos.

Nabatid na kama­kailan ay nagpatawag ng pulong ang  Malacañang para mamagitan sa girian ng MMDA at LTFRB.

Ayon kay Carlos, ang gagawing pagpupulong ngayon ng Metro Mayors  at LTFRB,  kasama ang Malacañang ay upang ipaalam sa mga alkalde ang nabuo o naging resulta nito.

Ang Metro mayors ang siyang bumubuo ng Metro Manila Council (MMC) na siyang policy making body ng MMDA.

Matatandaan na sa  ipinatawag na pulong  ng Malacañang sa MMDA at LTFRB  ay isa sa napagkasunduan ang  itutuloy ang panghuhuli sa mga kolorum  at out of line na mga sasakyan bilang pagsuway sa isang memorandum circular na inisyu  ng LTFRB  na may kinalaman sa “no apprehension policy”.

Nais umano ng  Malacañang na maipaabot mismo sa mga Metro Mayors kung ano ang mga napagkasunduan sa ginanap na pulong.