Toxic-free schools target ng DepEd

MANILA, Philippines - Desidido ang Department of Education (DepEd) na gawing “toxic-free” ang mga paaralan sa bansa sa paglulunsad ng information campaign laban sa mga nakalalasong kemikal na matatagpuan sa mga gamit at school supplies ng mga estud­yante.

Isang memorandum of agreement ang pinir­mahan nina Education Secretary Armin Luistro at environmental group Ban Toxics (BT) head Atty. Richard Guttierez para sa pagtutulungan sa kampanya upang mailayo ang mga batang mag-aaral sa mga toxic chemicals.

Kasama sa action plan ang pagsasagawa ng training sa mga guro, forums, lectures at mga aktibidad para sa mga mag-aaral ukol sa mga mapanganib na kemikal. Kabilang dito ang tinatawag na “Fearsome Five” na “mercury, lead, cadmium, asbestos at arsenic”.

Sinabi ni Luistro na kailangang matapos na ang dahan-dahang pagkalason ng mga bata sa mga paaralan na hindi nalalaman ng mga magulang.

Karamihan umano sa mga kemikal na nabanggit ay nasa mga gamit ng mga mag-aaral tulad ng mga krayola, markers at maging sa mga bags. Matatagpuan rin ang mga kemikal sa mga gamit, pintura, ilaw, gamit sa paglilinis.

Ipino-promote naman ng Toxics-Free Schools Program (TFSP) ang mga alternatibo at praktikal na solusyon habang mamumulat naman ang mga guro at tauhan ng mga paaralan sa mga gamit na may nakakasamang kemikal.